سياسة الخصوصية

مسودة: النص ده لسه بيتراجع قانونياً طبقاً لقانون حماية البيانات الشخصية رقم ١٥١ لسنة ٢٠٢٠، وممكن يتغيّر قبل ما يبقى نهائي.

1. ١. مين إحنا ومين المسؤول عن بياناتك

   • Fizioteq منصة بتستخدمها مراكز العلاج الطبيعي للأطفال لإدارة المواعيد والجلسات وتطور الأطفال والمدفوعات. المركز اللي طفلك بيتعالج فيه هو المسؤول عن بياناتك (المتحكم في البيانات)، وFizioteq بتعالج البيانات نيابة عنه وبتعليماته بس (المعالج).
   • لأي سؤال أو طلب عن بياناتك، كلّم المركز اللي بتتعاملوا معاه، وهو يتواصل معانا لو احتاج.

2. ٢. البيانات اللي بنجمعها

   • بيانات ولي الأمر: الاسم، ورقم الموبايل (هو اسم الدخول)، وصلة القرابة بالطفل.
   • بيانات الطفل: الاسم، ورقم الملف، وتاريخ الميلاد، والفرع، والدكتور المفضّل.
   • بيانات صحية (بيانات حساسة): التشخيص، والبرنامج العلاجي، وملاحظات الجلسات، والمهارات وتطورها، وتقارير الأقسام، وبيانات التقييم الأونلاين، والصور والملفات الطبية.
   • المواعيد والحضور، والمدفوعات وصور إيصالات التحويل، وتقييماتك للدكاترة.
   • موافقاتك (مثل رسايل التذكير ومتابعة الخطة) وإمتى اديتها أو سحبتها.
   • سجل أمان: مين فتح أو عدّل بيانات وإمتى، مع عنوان الجهاز (IP) ونوع المتصفح.
   • بيانات العاملين في المركز: الاسم، والموبايل، والدور، ومواعيد الشغل، والحضور والانصراف.

3. ٣. بنستخدمها في إيه

   • تقديم الخدمة العلاجية لطفلك: الحجز، والجلسات، ومتابعة التطور، وتواصل الفريق العلاجي مع بعض.
   • إدارة المدفوعات وحساب الطفل.
   • التذكير بالمواعيد ومتابعة الخطة، بموافقتك بس، ومن غير أي معلومات طبية في الرسالة.
   • حماية البيانات ومنع الاستخدام الغلط، والتزام المركز بالقانون.
   • مش بنبيع بياناتك، ومش بنستخدمها في إعلانات.

4. ٤. الأساس القانوني

   • بنعالج البيانات بناءً على موافقتك الصريحة (خصوصاً البيانات الصحية وبيانات الأطفال، اللي ولي الأمر بيوافق عليها)، وعلى تنفيذ الخدمة اللي طلبتها من المركز، وعلى التزامات المركز القانونية.

5. ٥. مين بيشوف إيه

   • كل شخص بيشوف اللي يخص شغله بس: الريسبشن بيشوف المواعيد والمدفوعات من غير الملف الطبي، والدكتور بيشوف ملف الأطفال اللي متابعهم بس، والسينيور والمالك بيشوفوا ملفات فرعهم.
   • أجر الدكتور بيشوفه الدكتور نفسه والمالك بس.
   • كولي أمر، بتشوف بيانات طفلك بس، والملاحظات اللي الدكتور اختار يشاركها معاك. الصور والملفات الطبية للفريق العلاجي بس.

6. ٦. مين بيساعدنا في تشغيل الخدمة

   • البيانات متخزنة عند مزوّد قاعدة بيانات سحابية (Supabase) على سيرفرات في الاتحاد الأوروبي (ستوكهولم، السويد)، والموقع شغال على Vercel. الاتنين ملتزمين بالسرية ومش بيستخدموا بياناتك لأي غرض تاني.
   • نقل البيانات برّه مصر بيتم في الحدود اللي القانون بيسمح بيها، وبالتراخيص المطلوبة من مركز حماية البيانات الشخصية.
   • لو المركز فعّل رسايل واتساب، الرسالة بتعدي على شركة Meta (واتساب) وفيها المعاد واسم الطفل الأول بس.

7. ٧. إزاي بنحمي البيانات

   • الاتصال كله مشفّر (https)، والبيانات الطبية متشفّرة كمان جوه قاعدة البيانات.
   • صلاحيات لكل دور بتتطبق في قاعدة البيانات نفسها، وسجل بكل اطلاع أو تعديل، وحد لمحاولات الدخول الغلط.
   • الصور والملفات في تخزين خاص، وبتتفتح بلينك بيقفل بعد دقيقة.

8. ٨. الكوكيز

   • بنستخدم كوكيز ضرورية بس: كوكيز الدخول، واللغة اللي اخترتها، وكوكي لتابلت الحضور في المركز. وتفضيلات الشكل (الوضع الليلي والخط) بتتحفظ على جهازك. مفيش كوكيز إعلانات أو تتبّع.

9. ٩. مدة الاحتفاظ

   • بنحتفظ بالملف طول ما الطفل بيتعالج، وبعد آخر نشاط بمدة بيحددها المركز (الافتراضي ٢٤ شهر). بعدها الملف بيتراجع علشان يتمسح، إلا لو القانون طالب يفضل مدة أطول.
   • سجل الأمان وسجل الموافقات بيفضلوا محفوظين علشان يثبتوا مين عمل إيه.

10. ١٠. حقوقك

    • إنك تعرف بياناتك وتاخد نسخة منها (من بوابة ولي الأمر: «نزّلي نسخة من كل بيانات طفلك»).
    • إنك تصحّح أي بيانات غلط، وتطلب مسحها في الحدود اللي القانون بيسمح بيها.
    • إنك تسحب موافقتك على الرسايل في أي وقت من البوابة، من غير ما ده يأثر على العلاج.
    • إنك تشتكي لمركز حماية البيانات الشخصية لو شايف إن بياناتك اتعالجت غلط.

11. ١١. لو حصل تسريب

    • لو حصل أي اختراق يمس بياناتك، بنبلّغ المركز فوراً، والمركز بيبلّغ الجهات المختصة وبيبلّغك في المواعيد اللي القانون بيحددها.

12. ١٢. تغييرات على السياسة دي

    • لو غيّرنا حاجة مهمة، هتظهرلك في المنصة قبل ما تتطبق.

شروط الاستخدامالدخول للمنصة